SAN JUAN, AP.- Un temblor di magnitut 6,4 a dal Puerto Rico den oranan tempran di mainta ayera, kousando morto di un hòmber, heridando 8 persona i a kousa hopi daño na konstrukshonnan na parti sùit di e isla.
E temblor tabatin vários réplika fuerte i ta parti di un seri di movementu ku for di 10 dia pasá ta sakudiendo e isla. E sismólogonan a bisa ku ta imposibel determiná ki ora e temblornan lo stòp òf si nan lo por bira mas fuerte.
Debí na e temblor di magnitut 6,4 a suspendé e suministro di koriente komo medida di prekoushon. Outoridatnan a bisa ku e dos plantanan a haña dañonan chikí i ta spera ku por drecha e servisio bèk den transkurso di dia. E aeropuerto prinsipal ta trahando normal usando generatornan di emergensia.
“Nunka mi tabatin asina tantu miedu den mi bida”, asina Nelson Rivera un habitante di 70 aña kende a hui di su kas di e siudat di Ponce serka di e episentro a bisa. “Mi a pensa ku nos lo no sobrebibí. Mi a kere ku nos lo keda dera aki nan. Esei tabata un horor”, asina el a relatá.
Gobernadó di Puerto Rico Wanda Vasquez a deklará estado di emergensia i a konvoká guardia nashonal. El a bisa ku algun 300 mil kas no tabatin awa ayera te mèrdia i tabatin hopi hende den lugá nan di refugio. El a bisa ku ainda e no a papia ku presidente Donald Trump.
8 persona a resultá heridá den e siudat di Ponce serka di e episentro di e teremoto, asina e alkaldesa Mayita Melendez a bisa na televishon WAPA.
