SAN SALVADOR, EL SALVADOR, AFP.- E tragedia kaminda fanátikonan a trapa riba otro djasabra a laga diesdos morto den stadion di Cuscatlan, na San Salvador, durante un partido di futbòl lokal, kual a provoká trouma entre e sobrebibientenan i konmoshon na El Salvador.
E perkanse a sosodé despues di apénas 10 minüt di wega kual a wòrdu suspendé. Asta e hungadónan a yuda ku tareanan di reskate.
Algun fanátiko a konta kon nan a sofoká bou di un kantidat di kurpa ku tabatin tirá riba nan. “Tabatin alrededor di sinku hende riba mi i mas pisá nan tabata keda bira i mi no por a hala rosea mas. Danki Dios mi a tene na pia di un polis i huntu ku un otro amigu nan a saka mi”.
E presidente di El Salvador, Nayib Bukele, a bisa ku Polis i Fiskal ta investigando pa determiná ken ta esnan responsabel pa e tragedia.
Kasi 24 ora despues di e tragedia, Fiskal no a reportá niun detenshon.
Segun informashon preliminar, e direktor di Polis Nashonal Mauricio Arriaza a bisa ku nuebe persona a muri den e stadion i tres mas den hospitalnan den e kapital.