NASSAU, BAHAMAS, AP.- E promé minister kanades, Justin Trudeau ta na Nova Scotia pa inspekshoná e dañonan provoká pa e siklon postropikal Dorian durante fin di siman.
Trudeau a bisa djamars ku e gobièrnu lo sostené e ekipo ku mester restourá koriente.
Mei mion usuario na e kosta atlántiko kanades a keda sin koriente despues ku e orkan a pasa djasabra, i e situashon no a kambia mashá pa 100.000 kliente di Nova Scotia djamars mainta.
Ehérsito a manda 350 efektivo Nova Scotia pa yuda restourá e servisio di koriente i habri kaminda.
Outoridat di emergensia den Karibe a informá ku e mortuarionan riba e isla bahameño di New Providence ta kompletamente yen, debí na e kantidat haltu di kadaver di víktimanan di orkan Dorian.
E Agensia Karibense pa Maneho di Kasonan di Desaster a indiká ku mester a pone algun kadaver den saku i warda nan den kònteiner ku èrko komo “un medida temporal”.
E gobièrnu di Bahamas a bisa ku por lo ménos 50 persona a muri o ku e kantidat di morto posiblemente lo oumentá.
