WASHINGTON, AP.- E gran atmirashon ku Donald Trump ta bisa ku e ta sinti pa e pueblo mehikano no tabata un opstákulo pa e presidente nobo kumpli ku su promesa di konstruí un muraya na frontera. E dekreto lo wòrdu firmá djárason, i tabata konvensí ku e desishon lo mehora relashon ku e pais bisiña.
Despues di firma dos akshon ehekutivo, Trump a ordená pa suspendé fondo federal pa “siudatnan santuario” i krea sentronan nobo pa para inmigrantenan no outorisá i reaktivá un programa federal pa hasi deportashonnan mas fásil.
“E fluho sin presedente di inmigrante ilegal di Amérika Sentral ta perhudiká México i Merka. E medidanan ku nos ta adoptando ta mehora seguridat den e dos paisnan”, asina e mandatario a bisa durante huramentashon di John Kelly komo sekretario di seguridat nashonal.
Ademas di primintí konstrukshon di e muraya, Trump a tilda inmigrantenan mehikano komo kriminal i violadó i a mustra e nesesidat di bolbe negoshá e tratado komersial ku su pais a suskribí ku México i Canada.
Djárason Trump a bisa ku e ta sinti “un gran atmirashon pa e pueblo mehikano” i a bisa ku e ta sperando gustosamente pa reuní ku su homólogo mehikano Enrique Peña Nieto.
