WASHINGTON, AP.- Merka a pidi Turkia un grabashon ku por revelá detayenan teribel di loke a pasa ku e periodista saudi Jamal Khashoggi, segun indikashon di presidente Donald Trump djárason. Sinembargo, e mandatario no a konfirmá si e grabashon ta eksistí i a pidi pasenshi miéntras Saudi Arabia ta sigui investigá. Prensa turko a informá ku e grabashon aki ta eksistí.
Trump a atvertí tokante posibel sanshonnan kontra Saudi Arabia na momentu ku e desaparishon di Khashoggi a bira konosí pa promé biaha dos siman pasa. Desde e tempu aki outoridat merikano a bisa ku mester haña mas informashon promé ku tuma medida.
Saudi Arabia, un aliado krusial di Merka den Medio Oriente, ta konfrontá petishon internashonal pa splika kiko a pasa ku Khashoggi, kolaboradó di Washington Post ku tabata biba na Merka. E tabata un kritiko prinsipal di e prínsipe aktual. Outoridat turko ta sigurá ku e periodista a wòrdu asesiná i segun e artíkulo di e korant turko, un grabashon di oudio ta revelá detayenan kruel tokante e desaparishon di Khashoggi den e konsulado saudi na Istanbul.
Trump a reiterá ku e rei saudi i e prínsipe no tabata sa di e detayenan tokante Khashoggi su morto. El a atvertí kontra konklushonnan prematuro.
