LONDON, AP.- Presidente di Merka, Donald Trump, a papia tokante e tema mas polémiko den polítika di Bretaña, pidiendo e gobièrnu britániko pa bandoná Union Europeo sin un akuerdo si e pais no logra sera un mihó akuerdo ku e mandatarionan di UE.
Den un entrevista publiká djadumingu pa Sunday Times, Trump a bisa ku Gran Bretaña mester “bandoná” e negosiashonnan i ninga di paga 49.000 mion dòler di e separashon si e pais no logra haña un mihó kondishon ku UE.
E presidente a señalá ku e lider di e partido Brexit, Nigel Farage, mester haña un ròl mas importante den e negosiashonnan.
E fecha di salida di Gran Bretaña for di Union Europeo ta fihá pa 31 di òktober. E postura di Gran Bretaña ta den un proseso di kambio dor ku promé minister Theresa May lo bandoná su liderazgo for di e partido djabièrnè, kual lo provoká un kontienda pa su reemplaso.
E deklarashonnan di Trump a wòrdu publiká promé ku e mandatario a kuminsá ku un bishita pa Granja Bretaña riba invitashon di reina, Elizabeth II. E lo reuní ku May djamars.
Trump a bisa ku Boris Johnson, e kandidato pa dirigí e partido Konservador, lo ta un “lider ekselente” pa Gran Bretaña.
E tradishon di Merka i otro lidernan mundial ta pa no duna opshon den kontiendanan polítiko interno di otro paisnan.
E embahador di Merka, Robert “Woody” Johnson, a bisa djadumingu ku e sosten di Trump pa Johnson ta dor di nan relashon personal.
“E konosé Boris Johnson ya pa un tempu largu kaba”, asina e embahador a bisa.
El a agregá ku Washington ta dispuesto na adoptá un akuerdo komersial sólido ku Gran Bretaña manera e pais bandoná UE.
