WASHINGTON, AP.- Presidente merikano Donald Trump a papia via telefòn ku su kolega ruso Vladimir Putin durante mas di un ora ayera i entre otro temanan, nan a papia relashoná ku e konflikto na Venezuela, kaminda Mòsku ta apoyá e gobièrnu aktual i Merka, oposishon.
Trump i Putin tambe a papia riba akuerdonan nuklear entre Washington i Mòsku i e posibilidat di involukrá China den e pakto tripartit di kontrol di arma.
Tambe nan a kombersá riba Nort Korea, Ukrania, e komersio entre Merka i Rusia i masha kortiku riba e informá fiskal spesial Robert Mueller relashoná ku e inherensia ruso den elekshon di 2016, asina e sekretaria di prensa di Kas Blanku Sarah Sanders a informá.
“Mi tabatin un kombersashon largu i bon ku presidente Putin di Rusia”, asina Trump a tuit despues di e yamada. “Manera semper mi a bisa, hopi promé di a kombersá riba e yagmentu di bruherianan, ku un bon relashon ku Rusia, China i tur otro ta algu bon i no algu malu”.
“Nos a papia di komersio, Venezuela, Ukrania, Nort Korea, Kontrol di armanan nuklear i inkluso di e engaño Ruso, un kombersashon masha pro aktivo”, asina el a agregá.
Sanders no a spesifiká di e pakto di kontrol di arma ku nan a papia di dje, pero e agensia estatal di Rusia Tass a reportá ku nan a papia di un akuerdo New Start, e último akuerdo importante di kontrol di arma ku ta sigui vigente entre Merka i Rusia. E akuerdo a keda firma na 2010 i ta terminá na 2021.
Ora a puntr’e riba e reunion den Pentagon pa trata e situashon na Venezuela, Sanders a bisa ku posishon merikano ta “ tur opshon riba mesa”. Rusia ta apoyá e gobièrnu di Nicolas Maduro i Merka ke derot’é.
