INDIANAPOLIS, INDIANA, MERKA, AP.- Presidente Donald Trump a anunsiá djabièrnè ku e lo saka Merka for di un akuerdo internashonal relashoná ku komersio di arma.
Trump a hasi e anunsio durante e konvenshon nashonal di NRA, kaminda el a primintí di lucha pa derechi di esnan ku ta karga arma di kandela. El a pidi miembronan di e organisashon pa respaldá su reelekshon.
Proposishonnan di lei pro arma ta stanka den Kongreso i Trump no por proba logronan konkreto riba e tereno aki durante su gobièrnu. Aparte di esaki e presidente a bisa ku e lo revoká e status di Merka for di Trato di Komersio di Arma di Nashon Uní, kual ta regulá e komersio internashonal di arma konvenshonal, desde pistol te na tankinan di guera, avion di kombate i barkunan di guera.
Presidente Barack Obama a firma e akuerdo na aña 2013, pero Kongreso no a ratifiká esaki. NRA a rechasá e akuerdo den pasado.
Aktivistanan na fabor di arma a kritiká e tratado miéntras esaki tabata wòrdu negoshá, dor ku el a wòrdu konsiderá komo un violashon di e siudadanonan su derechi poseé arma.
