WASHINGTON, AP.- Gobièrnu di Donald Trump ta buskando un forma kon pa lidia ku su frustrashon aktual kontra huesnan federal ku para e dekreto presidensial, inkluyendo temanan di inmigrashon i refugiado.
E gobièrnu a hiba e tema di e veto di prohibishon pa personanan di sierto pais pa Korte Supremo. Ademas, e gobièrnu a bisa ku ta emitiendo òrdunan pa para “politikanan di gobièrnu den e nashon kompleto”. E departamento di Hustisia ta sostené ku e tribunal máksimo mester “rechasá e práktika robes aki”, kual a wòrdu usá tambe pa para e represayanan kontra siudatnan santuario”, un veto na presensia di personanan transgenero den forsanan armá i e suspenshon di protekshon di hóbennan sin pèrmit di residensia ku a wòrdu tres’é den e pais desde mucha.
E sekretario di hustisia Jeff Sessions ta e krítiko prinsipal di e òrdunan. E funshonario a bisa djamars ku tabatin 20 òrdu hudisial di e tipo aki den e promé aña di gobièrnu di Trump “ e mesun kantidat ku den e ocho añanan di Barack Obama”.
Ekspertonan den lei ta atribuí e oumento di e tipo di òrdunan hudisial aki na un oumento similar di dekretonan presidensial. Na aña 2014, Obama a intervení pa protehá inmigrantenan ku yunan merikano despues ku Kongreso no a aprobá un reforma na leinan di inmigrashon. Trump, kier imponé restrikshonnan na e atmishon di personanan di shete pais di mayoria musulman un siman despues di a asumí su poder komo presidente.
