MIAMI, MERKA, AFP.- Donald Trump a presentá un demanda multimionario kontra su èks abogado Michael Cohen. E èks abogado ta un testigu klave den e kaso kontra e èks presidente na New York.
E demanda presentá den un tribunal federal na Florida ta akusá Cohen di e violá e sekreto profeshonal i e akuerdo di konfidensialidat entre nan dos, i ta eksihí 500 mion dòler pa daño i perhuisio.
Cohen no a kumpli “ku su debernan ku e demandante komo abogado” revelando sekretonan di Trump i publikando falsedat ku “por ta un bèrgwensa òf perhudisial” pa e èks mandatario, segun e demanda.
Cohen a deklará dilanti di e hurado di e fiskal di Manhattan, kende a akusá Trump ku 34 delito di falsifikashon relashoná ku un pago na e aktris di porno Stormy Daniels promé ku elekshonnan di 2016.
E èks abogado di Trump a revelá ku el a regla e entrega di 130.000 dòler na Daniels a kambio di su silensio tokante un sita ku Trump na aña 2006.
