CAUCA, COLOMBIA, AFP.- Manifestantenan indígena na sùitwèst di Colombia a tuma 16 sòldat komo rehen djárason pa represaya pa un intento di ehérsito pa arestá un miembro di e komunidat, asina outoridatnan a bisa.
Ehérsito a bisa den un komunikado ku su sòldatnan a wòrdu rondoná pa mas ku 700 persona ku a impedí nan di detené un hòmber buska pa e delito di “asesinato i fabrikashon i poseshon ilegal di arma di kandela”.
Outoridatnan a bisa ku e hòmber a resultá heridá purbando di skapa i aktualmente ta hañando tratamentu den hospital pa heridanan na su pia.
Indigenanan di Toribio den departamento di Cauca a akusá outoridatnan di mal trato i iregularidatnan durante e intento di aresto.
Nan a bisa ku e sòldatnan a drenta kas di e hòmber i a basha bala, akusando e di ta pertenesé na un grupo arma ilegal.
E famianan a informá ku e hòmber tabata víktima di un eror di identidat i ku apesar di a mustra e sòldatnan su dokumentonan di identidat, tòg nan a “ataká, mara i saka e hòmber lastrá for di su kas”.
