THURMONT, MARYLAND, MERKA, AP.- Presidente Donald Trump, sin menshoná e tamaño di e “boton nuklear” di Merka, a bisa djasabra ku e ta dispuesto na kombersá ku e gobernante norkoreano Kim Jong Un, kende el a referí komo e “hòmber kohete” i kende ta konfia ku lo tin avansenan den próksimo kòmbersashonnan entre e paisnan di Korea.
“Awor nan mester eksaminá e asuntunan di Weganan Olímpiko. Ta un komienso, un gran komienso”, asina Trump a deklará durante un seshon di pregunta i kontesta despues di e reunionnan ku el a mantené ku e lidernan republikano di Kongreso i miembronan di e gabinete riba e agènda legislativo di gobièrnu na 2018.
Den un evaluashon di e kòmbersashonnan di otro siman, Trump a señalá ku “si algu por pasa i surgi di e kòmbersashonnan, esaki lo ta grandioso pa e komunidat kompleto. E lo ta grandioso pa mundu”.
E mandatario a señalá ku el a kombersá ku e presidente surkoreano Moon-Jae-in, kende “a gradesí mi posishon estrikto”.
E gobièrnu di Trump a bai di akuerdo pa desplasá su kòmbersashonnan pa un relashon militar konhunto ku Surkorea mas fuerte pa despues di Weganan Olímpiko. E sekretario di Defensa, Jim Mattis, a indiká ku dor di desplasá esakinan ta práktiko i kumbiniente pa komposishonnan i no un gesto polítiko.
