ANKARA, TURKIA, AP.- Atakenan entre forsanan di seguridat turko i milisianonan kurdo den tres provinsia di mayoria kurdo na sùitost di Turkia a laga un saldo di 31 milisiano i ocho efektivo morto. Asina outoridat a informá djaweps.
E choke a tuma lugá serka di pueblo di Semdinli, serka di e frontera ku Irak, na momentu ku forsanan di seguridat a sorprendé un grupo rebelde ku tabata kier a efektuá e atake, segun forsanan armá. Den e konfrontashon seis sòldat i dos guardia di e pueblo a muri, kende tabata lucha huntu ku nan.
Ministerio di Interior a informá ku 19 rebelde a muri den e choke i un otro operashon ku respaldo aéreo lansa pa kapturá nan. Nuebe rebelde mas a muri den e choke den provinsia di Tunceli i tres mas den provinsia di Sirnak, segun e ministerio.
E rebeldenan di Partido Obrero di Kurdistan, PKK, ta aktivo den sùitost di e pais desde tres dékada kaba. Esaki ta un konflikto kaminda desena di míles a muri. Turkia, Merka i Union Europeo ta konsiderá PKK komo un organisashon terorista. E violensia a bolbe surgi den 2015 despues di e frakaso di un proseso di pas.
