WASHINGTON, USA (AFP).- Departamento di Hustisia norteamerikano mester paga 100 mion dollar pa resolvé demandanan kontra di FBI pa mal maneho dje investigashon riba abusu seksual kometé pa e eks-dòkter dje ekipo di gimnasia di Merka Larry Nassar, segun Wall Street Journal a informá ayera.
E korant a bisa ku e akuerdo ta referí na 100 víktima di Nassar, kende na fin di 2017 i kuminsamentu di 2018 a keda kondená pa a agredí seksualmente algun shen deportista i awor ta kumpli ku un kondena di te hasta 175 aña di prizòn.
E medayistanan di oro olímpiko Simone Biles, Aly Raisman i McKayla Maroney i otro gimnastanan merikano a presentá un demanda di mil mion dollar kontra di FBI den yüni di 2022 pa no a aktua di forma adekuá ku e informashonnan di abusu seksual di parti di Nassar.
Segun Wall Street Journal ku e akuerdo ta data di vários luna i a keda aseptá pa e víktimanan di Nassar, pero ainda no a keda finalisá.
Sitando un informe di inspektor general di Departamento di Hustisia, e korant a bisa ku tabatin vários fayo den e maneho di parti di FBI despues di a risibí e denunsianan kontra di Nassar presentá pa USA Gymnasticis na e ofisina lokal di FBI na Indianapolis den yüli di 2015. E falta di akshon riba e denunsianan a permití pa Nassar por a sigui agredí seksualmente desena di víktima promé ku su aresto den 2016.
Nassar a traha komo médiko deportivo di e federashon di gimnasia di Merka (USA Gymnastics) i den Universidat Estatal di Michigan durante mas di dos dékada.
E direktor di FBI, Christopher Wray, a rekonosé e fayonan durante un testimonio dilanti un komité di Senado den sèptèmber di 2021, bisando ku nan tabata “imperdonabel”.
