GENEVA, SWITZERLAND, AFP.- Un “kantidat grandi” di paisnan pober mester a suspendé nan programa di vakunashon pa falta di vakuna, segun indikashon di Organisashon Mundial di Salú djabièrnè.
E skarsedat ta nifiká ku esnan ku a haña un inyekshon di COVID-19 mester warda demasiado largu pa haña e di dos inyekshon.
“Nos tin un kantidat enorme di pais ku mester a suspendé e segundo inyekshonnan di vakuna”, segun Bruce Aylward di OMS i Covax.
E funshonario di OMS a bisa ku paisnan rònt mundu ta afektá pa e problema aki, inkluyendo Latinoamérika i Medio Oriente.
Serum Institute òf India, kual ta produsí AstraZeneca a akordá pa proveé Covax ku e vakunanan nesesario pa parti pa paisnan pober. Pero India a prohibí tur eksportashon di vakuna pa kombatí su propio brote di Corona vírus.
Aylward a bisa ku ta trahando ku AstraZeneca i SII direktamente pa India kuminsá eksportá pa logra ku e poblashonnan ta haña nan segundo dósis.
OMS ta atvertí ku e vírus ta moviendo mas rápido ku e vakunanan. Ademas, e promesa di G7 pa entregá un bion vakuna na nashonnan pober no ta sufisiente.
Solamente un porshento di e poblashon di Afrika ta kompletamente vakuná, segun OMS. Te ku djaweps, Covax a logra proveé solamente 88 mion vakuna entre 131 pais, ménos ku loke a plania.