CARACAS, AP.- Presidente Nicolás Maduro a duna òrdu pa habri frontera di Venezuela ku Brasil i Aruba. E mandatario a sera frontera den febrüari, den un intento pa blòkia e entrega di yudansa humanitario di oposishon.
E minister venezolano di Industria, Tareck El Aissami, a presisá ku e frontera ku Colombia, Kòrsou i Boneiru lo keda será dor ku nan lidernan duna sufisiente siguransa ku e soberania di Venezuela ta wòrdu respetá.
E frontera ku Colombia ainda ta será, pero míles di venezolano ta sigui krusa via krusadanan ilegal pa hui di e krísis den e pais.
E gobièrnu sosialista di e nashon suramerikano a duna òrdu pa sera e fronteranan tres luna pasá, na momentu ku oposishon a purba hasi entrega di alimento i suministronan médiko. E yudansa a wòrdu proporshoná pa Merka, un aliado klave di Juan Guaidó, kual mas di 50 nashon ta rekonosé komo presidente legítimo di Venezuela.
Maduro ta kalifiká e yudansa komo un violashon na e soberania di Venezuela i un intento pa Merka kit’é di poder.
El Aissami a bisa ku e lider di Aruba tabata enfátiko, segurando ku e isla lo no interferí den asuntunan interno di Venezuela.
El a agregá ku e fronteranan lo keda será si Boneiru, Kòrsou i Colombia no sigurá ku lo para tur “hostilidat” i intentonan pa destabilisa e gobièrnu di Maduro.