WASHINGTON, AP.- E gobernador di Washington a deklará un estado di emergensia djasabra despues ku un hòmber a muri komo konsekuensia di e COVID-19, e promé morto di su sorto reportá na Merka. Mas di 50 persona den un kas di ansiano ta malu i mester wòrdu di tèst pa e vírus aki.
Gobernador Jay Inslee a instruí agensianan estatal pa nan usa “tur rekurso nesesario” pa prepará i reakshoná kontra e brote nobo di coronavirus.
“Nos lo sigui traha te dia niun hende mas muri di e vírus aki”, asina e gobernador a primintí.
E hòmber ku a muri tabatin entre 50 i 60 aña i e no a biaha pa ningun kaminda ni e no tabatin kontakto ku ningun kaso di COVID-19 konosí, segun indikashon di funshonarionan di salú di estado di Washington den un konferensia di prensa. E bosero di Sentro Médiko EvergreenHealth, Kayse Dahl a bisa ku e persona a muri den suburbio di Seattle.
E kantidat kresiente di kasonan na California, estado di Washington i Oregon ta konfundiendo outoridat mirando ku e personanan infektá no a biaha den eksterior resientemente ni tabatin kontakto serkano òf íntimo ku ningun biahero òf persona infektá.
