MANAGUA, AP.- E wèlga di hamber ku 11 miembro di famia di personanan konsiderá komo “prezu polítiko” den un iglesia den e siudat nikaragwense a kumpli shete dia djárason. Ademas, e kapital a registrá un protesta nobo di studiantenan.
E ayuno a inisiá djaweps den parokia San Miguel Acangel dirigí pa saserdote Edwin Roman, konosí komo kritiko di gobièrnu di Daniel Ortega. E tèmpel ta rondoná pa polis, kual a impedí entrada i salida di tur hende, inkluyendo esnan ku asistensia humanitario.
No tin informashon tokante e wèlguistanan su situashon, pero nan kier pa outoridat liberá nan yu i rumannan detené pa protesta kontra gobièrnu.
Roman a kritiká ku gobièrnu a kòrta e tèmpel su servisio di awa i koriente den zona di e iglesia, kual ta pone su bida na riesgo komo ku e ta diabétiko i mester di kuminda i remedi friu pa su kondishon.
Diferente studiante di Universidad Americana di Managua a realisá un protesta pa eksihí liberashon di opositornan detené. Esaki ta e di dos protesta di studiante ku ta wòrdu realisá na Managua durante e último 24 oranan. Alumnonan di Universidat Centroamericana (UCA) a efektuá un marcha kaminda nan a konfrontá ku efektivonan anti disturbio dilanti e entrada prinsipal.
