SLOVIANSK, UKRANIA, AFP.- Un kantidat grandi di persona a bandoná Sloviansk, un siudat ost di Ukrania ku a keda sin awa ni koriente, despues ku su alkalde a pidi e evakuashon debí na kantidat di bombardeo di parti di ehérsito ruso.
“E situashon a empeorá, e eksploshonnan ta kada be mas intenso i e bòmnan ta kai kada bes mas tras di otro”, asina Gulnara Evgaripova un studiante di 18 aña a bisa miéntras e tabata subi un di e sinku mini busnan di evakuashon ku tabata warda dilanti di un edifisio atministrativo di Sloviansk, den e region Donetsk.
Un bombardeo ruso ya a provoká tres morto i seis herido djamars pasá, asina vários habitante a bisa AFP. E siudat aki tabata konta ku 100 mil habitante promé ku 24 di febrüari ora e invashon ruso a kuminsá. E alkalde Vadim Liakh tambe a informá di un bombardeo nobo den serkania di e siudat ku a daña vários liña di tenshon haltu pero no a kousa víktima mortal. No tin ni koriente ni awa, asina e Liakh a bisa den un mensahe riba Telegram.
