PARIS, AP.- Outoridat di polis i duana a ehekutá un operashon mundial kontra kontrabanda salbahe, kual a permití konfiská míles di animal den peliger di ekstinshon. Kasi 600 sospechoso a wòrdu arestá durante e operashon aki.
Organisashon Mundial di Duana i Interpol a realisá kasi 2.000 konfiskashon den 109 pais durante un operashon históriko ku a yuda outoridat konfiská 10.000 turtuga bibu, 1.500 reptil bibu, 20 makaku bibu, entre otro segun informashon di e agensianan djárason.
Operashon Thunderball a wòrdu operá for di un edifisio di inovashon di Interpol na Singapur i a sòru pa aresto di 582 persona.
Gruponan defensor di medio ambiente a selebrá e operashon kontra kontrabanda aki.
“E interupshon masivo den e tipo di retnan aki ta klave pa salba espesienan den peliger di ekstinshon rònt mundu”, segun Sosiedat pa Konservashon di Bida Salbahe a indiká den un komunikado. Komèrsio ilegal di founa salbahe ta un industria ku ta involukrá miónes di dòler, segun outoridat.
Sin embargo, outoridat a atvertí ku e konfiskashonnan ta e promé stap i ku “awor e gobièrnu mester kontinuá ku huisio i demandanan severo i signifikativo”.
