SHAHEDSHAHR, IRAN, AP.- Un avion ukraniano ku 176 persona na bordo a kai djárason, algun minüt despues di a lanta buelo na e aeropuerto prinsipal di Tehran. Niun hende no a sobrebibí.
E insidente di e buelo di Ukraine International Airlines a sosodé algun ora despues ku Iran a lansa un atake ku misil kontra basenan irakí ku diferente sòldat merikano. Funshonarionan iraní a bisa ku nan ta sospecha ku e Boeing 737-800 a kai pa motibu di problemanan tékniko ku esaki a frekuentá. Outoridat ukraniano tabata di akuerdo ku e kousa pero a hala atras i a bisa ku ta investigando e kaso.
Tabatin 167 pasahero i nuebe tripulante di diferente pais na bordo di e avion. Tabatin 82 iraní, 63 kanades i 11 ukraniano na bordo. Ademas, 10 siudadano sueko, kuater afgano, tres aleman i tres britániko mas a muri den e insidente.
E presidente di Ukrania, Volodymyr Zelenskiy a ofresé su kondolensia na famia di e víktimanan. E mandatario a terminá su bishita na Oman pa regresá Kiev debí na e insidente. E promé minister Oleksiy Honcharuk a konfirmá e sifra di morto.
Ukraine International Airlines a suspendé su buelonan pa Tehran.
E avion a lanta buelo ku kasi un ora di retraso djárason i no a logra yega 8.000 pia den laira, segun FlightRadar24.
