RIO DE JANEIRO, AP.- Awaseru intenso a sigui kai na Rio de Janeiro djamars, kousando morto di kuater persona. Outoridat a kanselá lès i a pidi e pueblo pa evitá di sali riba kaya.
E koriente di awa tabata baha, lastrando outo i bashando palunan abou despues di e áwaseru fuerte ku a kuminsá djaluna atardi. E alkalde Marcelo Crivella a bisa ku e siudat ta enfrentando un “krísis”.
152 milimeter di awa a kai den kuater ora segun funshonarionan munisipal, superando e promedio den aprel kompleto. E bario di hardin botániko, un destino turístiko, tabata un di esnan mas afektá, ku 231 milimeter di áwaseru den un periodo di 24 ora.
A bati alarma den 20 zona di riesgo pa inundashon pa e pueblo buska un lugá safe pa keda. Pero Crivella a bisa ku no a bati alarma den favela di Babilonia. Bisiñanan a keha pa e falta di atvertensia.
Outoridat a bisa ku un terser persona a hoga i te ainda no sa e kousa di morto di e di kuater persona.
E favelanan, kual normalmente ta keda riba sera ta partikularmente vulnerabel pa avalancha di lodo.
