MIAMI, USA (AFP).- Hustisia norteamerikano ayera a kondená na bida largu e hòmber Joseph Vincent, akusá di a konspirá pa mata e presidente haitiano Jovenel Moïse, riba 7 di yüli di 2011 na Port-au-Prince.
Vincent, un haitiano norteamerikano di 58 aña, a komparesé dilanti un tribunal federal di Miami, dos luna despues di a deklará su mes kulpabel di a partisipá den e krímen. Den un deklarashon firmá, e akusado a atmití den desèmber di a reuní ku otro konspiradornan for di febrüari di 2021 te ku e dia dje asesinato.
Den mardugá di 7 di yüli, el a bai ku otro akusadonan na e kas privá di Moise, kaminda ku komando di mersenarionan kolombiano a tira e presidente mata sin ku esaki su bodyguardnan a intervení.
Su funshon den e konspirashon tabata di a konsehá su kómplisenan riba e panorama polítiko haitiano, asistí na reunionnan ku lidernan polítiko dje pais i partisipá den un plan pa lanta e protestanan kontra di Moise i usa e lantamentu pa baha e presidente. Na vários okashon e tabata usa un pin di Departamento di Estado norteamerikano, ku kua e tabata laga hendenan kere di ta traha pa Washington.
Vincent, un eks-informante di agensia anti droga merikano (DEA), segun Miami Herald, a komprometé su mes na kolaborá ku ministerio públiko.
Bistí ku paña di prezu, el a drenta sala di korte kanando ku difikultat i usando un garoti. Promé di a skucha e sentensia, el a dirigí su mes na e presentenan. “Por fabor, pordoná mi pa loke m’a hasi”, el a bisa den krioyo haitiano.
Hustisia merikano a reklamá hurisdikshon riba e kaso, den kua a akusá 11 persona, pa motibu ku e plan pa mata e outoridat haitiano a keda trahá na Florida.
Segun ministerio públiko, e konspiradornan ker a sekuestrá Moise i sustituí su persona ku Christian Sanon, un siudadano haitiano norteamerikano. Pero komo ku nan no a logra ku e sekuestro, a tir’é mata.
Na Haiti nan a detené 17 persona pa e asesinato dje mandatario, pero segun Miami Herald ku ningun di nan a keda akusá di forma ofisial.
