MOSKU, RUSIA, AFP.- Kremlin ta sigurá ku e bishita di presidente ukraniano Volodimir Zelenski na Merka ta un prueba di falta di boluntat di skucha Rusia i e presidente ruso Vladimir Putin, afirmando ku e ta deseá ku e konflikto ta kaba mas pronto posibel.
Den su promé biahe internashonal for di inisio di e konflikto, Zelenski a risibí un trato komo héroe na Washington, kaminda el a reuní ku su homólogo Joe Biden na Kas Blanku i a pronunsiá un diskurso kaminda el a haña hopi aplouso den kongreso.
E hefe di estado ukraniano a haña ademas e promesa di un pakete masivo di yudansa i entreganan nobo di arma ku ta inkluí pa promé bia den e sistema di defensa anti aéreo Patriot.
Pa Zelenski, e yudansa ta indispensabel pa su trupanan i ta un invershon den e seguridat global i e demokrasia. Presidente ruso Vladimir Putin a sigurá sin embargo ku su ehérsito lo haña e anti doto pa eskivá e sistema di defensa.
“Esnan ku enfrentá nos ta bisa ku ta un arma defensivo. Hopi bon, nos lo tene kuenta kuné. Semper tin un anti doto. E hendenan ku ta hasiendo esaki ta hasié envano. E no ta sirbi mas pa prolongá e konflikto”, asina el a bisa na prensa.
