WASHINGTON, AFP.- E hefe di diplomasia di Merka Anthony Blinken a asistí ayera den loke gobièrnu di Joe Biden tabata preparando pa e pió esenarionan na Afganistan miéntras legisladónan tabata akusá Kas Blanku di enkabesá un desaster históriko.
Blinken konosí komo un persona di karakter masha suave, ta enfrentá durante dos dia un interogatorio duru, ku den promé instansia tabata dilanti di e komishon di relashonnan internashonal di Kamara di Representante.
E rivalnan di gobièrnu di Biden a probechá pa kuestioná e rekuperashon rápido di gobièrnu afgano pa parti di e talibannan ora Merka a pone fin na su intervenshon militar di 20 aña.
Blinken a bisa e komishon ku e atministrashon ta fuertemente konsentrá den seguridat di e merikanonan i ku a evaluá konstantemente e poder di permanensia di e gobièrnu afgano sostené pa oksidente, konsiderando múltiple esenario.
“Inklusive e esenarionan mas pesimista no a presidí ku forsanan gubernamental na Kabul lo kolèps miéntras ku forsanan merikano lo keda”, den e pais asina Blinken a bisa. “No opstante esaki, nos a planifiká i a pone den práktika un programa amplio di kontingensia”, asina el a agregá. “E evakuashon riba su mes tabata un esfuerso ekstraordinario, den e kondishonnan mas difísil ku por tin, pa parti di nos diplomátikonan, militarnan i profeshonalnan di inteligensia”, asina e sekretario di estado a bisa.
