MILAN, AP.- Un boto di reskate italiano ku 46 migrante na bordo a mara na e haf italiano di Lampedusa, apesar di un prohibishon eksplísito, despues di a deklará un estado di emergensia na bordo.
E minister di Interior italiano,Matteo Salvini, un antiinmigrante intransigente ku ta prohibí botonan di reskate pa drenta hafnan italiano, a ekspresá su iritashon ku e kaso atraves di un serie di tweet.
Esaki ta un akto similar na esun di un boto aleman ku no a obedesé òrdu i dal den un boto polisial ku a purba blòkia e boto di migrante pa evitá ku esaki ta ankra na e haf di Lampedusa.
Imahenan di televishon a mustra e migrantenan trankil sinta, na bordo di e boto Mediterranea Saving Humans.
Salvini a tweet ku malta a ofresé pa risibí e migrantenan aki.
E grupo, ku a entrega 13 pasahero na Warda Kosta italiano pa problema ku salu, a bisa ku nan a tuma e desishon pa ankra debí na e “kondishonnan a-higiéniko i intolerabel na bordo”. El a agregá ku Lampedusa ta e “úniko haf safe pa ankra” komo ku e boto tabata den teritorio di Italia.
Pero e grupo humanitario Sea Eye a bisa ku su boto di reskate Alan Kurdi ku 65 migrante na bordo tabata nabegando rumbo pa Lampedusa.
E minister di Interior aleman, Horst Seehofer, a pidi Salvini pa retirá su òrdu pa prohibí botonan reskate pa mara na hafnan di Italia, segun informashon di e agensia di reskate dpa.
