CARACAS, AP.- E detenshon di un diputado opositor, akusá di ta vinkulá ku e intento di e atentado kontra presidente Nicolás Maduro, i e anunsio di kita inmunidat kontra algun kongresista a kousa mas tenshon na Venezuela djárason.
Algun ora promé ku Konstituyente a sigui ku e prosedura pa kita inmunidat di algun diputado, Asamblea Nashonal, kontrolá pa oposishon” a deskartá ku mester rekonosé e desishon i a akusá e instansia di kita parti di e funshonnan di Legislativo.
E maneho di Kongreso a kondená e detenshon di diputado Juan Requesens, di 29 aña, i a akusá Servisio Bolivariano di Inteligensia Nashonal (SEBIN) di sekuestrá i violá e proseso kongresista, kual a wòrdu saká for di su apartamentu ku su ruman muhé. Esaki ta konforme un video publiká riba retnan sosial.
“Nos konstitushon ta indiká bon kla i ta bisa ku pa atendé ku asuntunan di inmunidat parlamentario, tin un Asamblea Nashonal”, asina e visepresidente di Kongreso, Julio Cesar Reyes a bisa na The Associated Press. El a anunsiá ku ta posibel pa Legislashon, akudí instansianan internashonal pa denunsiá e akshonnan di Konstituyente i e detenshon di Requensens.
Maduro a akusá eks presidente di Kongreso Julio Borges, kende ta desde vários luna na Colombia, i tambe Requensens di ta vinkulá ku e intento di atentado kual a wòrdu sufrí djasabra durante un desfile militar ku a wòrdu realisá den sentro di Caracas i kaminda shete militar a resultá heridá.
