LONDRINA, BRASIL, AFP.- Un estudiante di 16 aña a fayesé i un kompañero di mesun edat a resultá gravemente heridá ayera den un atake ku arma di kandela. E atakante tabata un èks alumno di un skol na sùit di Brasil, segun indikashon di outoridatnan.
E evento a sosodé na un sentro di edukashon den region metropolitano di Londrina, un siudat den estado sùit di Paraná. E atakante a keda detené.
“Un èks alumno a drenta armá” despues ku el a presentá na skol pa “pidi su historial eskolar”, segun indikashon di gobièrnu di Paraná den un komunikado.
Na momentu ku el a drenta, “el a tira dos persona. Un studiante di 16 aña a muri na e sitio” i e otro studiante ataká, di mesun edat, “ta interná den hospital i su kondishon ta grave”, segun informashon di e gobièrnu estatal.
Prensa lokal a informá ku e agresor tin 21 aña.
Polis a yega e skol den apénas tres minüt, evitando un tragedia mas pió”, segun e gobernador di Paraná, Carlos Ratinho Junior, ku a deklará tres dia di luto den e estado.
Presidente di Brasil, Luiz Inácio Lula da Silva, a risibí e notisia ku “tristesa i indignashon”.
Atakenan na skol a subi resientemente na Brasil i outoridatnan ta atribuí e kresementu aki, na e “hustifikashon di violensia” ku ta sirkulá riba retnan sosial.
