WASHINGTON, AP.- E direktor antiterorismo di departamento polisial di New York, John Miller, a bisa ku e artefakto eksplosivo manda pa ofisinanan di CNN na New York a wòrdu manda pa e mesun persona ku a manda bòm na kasnan di e filantropo mionario George Soros, eks sekretaria di Estado Hillary Clinton i eks presidente Barack Obama.
Tur e aparatonan tabata un bòm den un tubu, segun indikashon di Miller huntu ku otro funshonarionan den konferensia di prensa na New York.
E krímennan a kuminsá djaluna anochi, na momentu ku a konfiská un pakete mandá pa Soros, segun Miller. El a agregá ku esaki tabata un modus operandi komun, i ku te ainda ningun persona a wòrdu detené.
E gobernador di estado di New York, Andrew Cuomo, a bisa den e konferensia di prensa ku lo no ta un sorpresa si outoridat deskubrí mas artefakto. El a indiká ku su ofisina a haña unu. Esaki a wòrdu desmantelá.
Miller a bisa ku ekspertonan ta eksaminando e sustansianan deskubrí pa determiná si esaki ta tóksiko.
Hillary Clinton a gradisí Servisio Sekreto i tur agensia di seguridat pa interseptá e pakete di eksplosivo mandá na su kas. “Nos tur ta bon”, asina e eks sekretaria di Estado i eks promé dama na Florida. E ta hasiendo kampaña den e estado aki pa sostené kandidatonan demókrata.
E bosero di Kas Blanku Sarah Huckabee Sanders a tweet ku “e aktonan aki ta kobarde i inaseptabel i lo no wòrdu tolerá”.
Servisio a indiká ku e vershonnan ku esaki a deskubrí un pakete mandá pa Kas Blanku “no ta korekto”.
