BASE AL-OMAR, SIRIA, AP.- Kombatientenan di Grupo Estado Islámiko ta impidiendo mas di 1.000 sivil di bandoná un área chikitu ku e grupo ekstremista ta kontrolá na ost di Siria. Esaki ta konforme informashon di un bosero di forsa sirio respaldá pa Merka.
Presidente Bashar Assad a bisa ku solamente ehérsito sirio por protehá e gruponan na nort di e pais, kual ta un kontradikshon di indikashonnan ku forsa turko por ataká e área na salida merikanonan for di e zona.
Mandonan di Forsa Demokrátiko Sirio a bisa ku e ekstremistanan ta skonde entre sivilnan den un kampamentu i usa un ret di kueba i tùnel pa transitá. Estado islámiko, un grupo ku a kontrolá gran parti di Siria i Irak ta establesé riba un área di ménos di un kilometer kuadrat den lokalidat di Baghouz, na ost di Siria.
E atakenan aéreo di e koalishon i konfrontashonnan den Baghouz ta kontinuando ainda. Tabatin un tiroteo ku e ophetivo pa detektá minanan segun kombatientenan di Forsa Demokrátiko Sirio tabata avansá.
E kaptura di e último base di Estado Islámiko na Siria i Irak ta nifiká final di un kampaña mundial di kuater aña pa pone fin na kalifato di e grupo ekstremista. Na aña 2014, e ekstremistanan tabata kontrolá kasi terser parti di ámbos nashon.
Sinembargo, vários eksperto i funshonario di defensa merikano ta atvertí ku e grupo no ta forma un menasa i por krese dentro di seis luna si no sigui preshoná nan.
