SANTO DOMINGO, REPUBLICA DOMINICANA, AFP.- Un diplomátiko sekuestrá ya pa kuater dia pa un gèng peligroso na Haiti a wòrdu liberá, segun informashon di e kansier na Santo Domingo djárason.
Carlos Guillen, konsehero agríkola dominikano na Port-Au-Prince, a wòrdu sekuestrá djabièrnè mèrdia den bario di Croix-des-Bouquets, serka di Port-Au-Prince, riba ruta pa frontera.
E minister dominikano di Eksterior, Roberto Alvarez, a indiká ku Guillen “a rekobrá su libertat i ta sano i salvo, despues di 4 dia di sekuestro”, den un tweet publiká den oranan di mardugá sin duna mas detaye. “Nos ta gradisí tur esnan ku a partisipá aktivamente den su liberashon”.
Un fuente di kansieria a señalá djadumingu ku e sekuestro a wòrdu ehekutá pa e gèng peligroso “400 Mawozo”, kual ta kontrolá Croix-des-Bouquets i e karetera kompleto ku ta kondusí na frontera i konektá ku e pueblo dominikano di Jimani.
E kondishonnan di liberashon no a wòrdu publiká. Prensa dominikano a informá ku e gèng a pidi un reskate di 500.000 dòler pa e funshonario, kual tabata riba ruta pa Jimani.
