KIEV, UKRANIA, AFP.- Rusia ta preparando un desfile militar den siudat ukraniano di Mariupol (sùitost), bou di kontròl di Rusia ya pa algun siman kaba. E desfile lo tuma lugá riba 9 di mei, e fecha kaminda ta rekordá e pais su viktoria kontra nazi aleman, segun indikashon di e servisio militar di inteligensia ukraniano (GUR).
Segun GUR, e direktor di atministrashon presidensial ruso, Serguei Kirienko, a yega Mariupol pa prepará e desfile aki.
“E mishon prinsipal di Putin ta pa prepará e selebrashonnan di 9 di mei”, segun indikashon di GUR den un komunikado publiká riba Telegram. Mariupol “lo kombertí den un sentro di selebrashon”, segun e komunikado.
“Lo limpia tur avenida prinsipal di e siudat ku urgensia i deshasí di kadavernan i munishonnan ku no a eksplotá”, asina e komunikado a añadí.