KIEV, UKRANIA, AFP.- Alrededor di 800 sivil a buska refugio den un planta kímiko di siudat di Severodonetsk, na ost di Ukrania, kaminda ehérsito ukraniano i rusonan ta bringando otro pa vários dia kaba, segun indikashon di abogado di Dmytro Firtach, propietario di e planta.
“Alrededor di 800 sivil a buska refugio den planta kímiko Azot, propiedat di Grupo DF di Dmytro Firtach”, segun un komunikado di Lanny Davis, abogado di e propietario.
“Entre e 800 sivilnan tin 200 di 3.000 empleado di e planta i 600 residente di Severodonetsk”, asina el a añadí. Presidensia ukraniano no a konfirmá e informashon ainda.
Segun e komunikado publiká riba wepsait di Grupo DF, e 200 empleadonan ku ainda tei presente ta pa garantisá protekshon di produktonan kímiko altamente eksplosivo ku ainda ta na e sitio.
Planta Azot ta na Severodonetsk, un siudat stratégiko klave di region Lugansk, na ost. Trupanan ruso ta purbando di gara kontrol di e region ya pa vários siman kaba.
