HELSINKI, AP.- Un krusero ku 1.300 pasahero i tripulante tabatin problema ku motor i a manda un señal di ousilio dilanti kosta di Noruega. E barku a keda inmóbil na e kosta oksidental di e pais ku laman brutu.
Ekiponan di reskate a kuminsá ku labornan di evakuashon ku riesgo haltu, sakando e okupantenan un pa un via helikòpter. E olanan fuerte a sakudí barku di un banda pa otro, meimei di bientu fuerte.
E korant Noruega VG a bisa ku e krusero Viking Sky tabatin problema ku motor na komienso di e mal tempu ku a gòlpia algun region na kosta di Noruega djasabra. Polis di kondado di Moere og Romsdal, na wèst di Noruega, a bisa ku e barku a logra ankra na Bahia Hustdsvika, entre siudat Alesund i Trondheim, pa asina e pasaheronan por a keda evakuá.
Ekiponan di reskate riba helikòpter i boto a akudí na e sitio pa yuda evakuá e barku bou di sirkunstansianan ekstremadamente kompliká.
Mayoria pasahero tabata turistanan britániko i merikano. Mas o ménos 180 a wòrdu reskatá, segun ekiponan di reskate a indiká.
Potrèt i video di personanan riba e krusero a mustra kon esaki tabata move, ku stul i mesanan tambe moviendo di forma peligroso riba e barku. E olanan fuerte a kibra bentananan di e barku kousando ku awa friu tabata kore na pia di e pasaheronan.
E evakuashon di Viking Sky a tuma lugá slou i peligroso, ya ku e pasaheronan mester a subi un pa un desde e krusero na e sinku helikòpternan disponibel.