CARACAS, AP.- Presidente venezolano Nicolás Maduro ta akusá Merka i Colombia d sostené e golpe di estado, el a kritiká e presidente merikano i algun miembro di su ekipo ku a publiká mensahe riba nan kuentanan di Twitter.
Maduro a referí na e deklarashon di sekretario di estado Mike Pompeo tokante su supuesto plan di eskape pa Cuba.
Presidente Nicolás Maduro a anunsiá ku e lantamentu militar dirigí pa un “grupo nefasto” a wòrdu neutralisá.
Maduro a sigurá ku e lantamentu militar a wòrdu dirigí pa Juan Guaidó i e dirigente opositor Leopoldo Lopez. El a indiká ku tres fiskal a wòrdu designá pa dirigí e investigashonnan i realisá e “akusashonnan penal” pa e “delitonan grave” ku a wòrdu kometé.
E mandatario a bisa ku sinku militar a resultá heridá durante e lantamentu aki. Nan ta den terapia intensivo.
Juan Guaidó a pidi su siguidónan pa kontinuá ku e akshonnan kontra gobièrnu.
Lopez a paresé djamars huntu ku Juan Guaidó. El a keda den silensio i no a mustra kara desde ku el a wòrdu detené na aña 2014, i despues kondená pa dirigí disturbionan kontra e gobièrnu. Lopez a wòrdu liberá di su aresto domisiliario.
E direktor di polis sekreto di Venezuela a kibra laso ku presidente Nicolás Maduro. Esaki ta e kiebro di relashon mas relevante di parti un miembro importante di forsa di seguridat.
Christopher Figuera, direktor di Servisio Bolivariano di Inteligensia Nashonal (SEBIN) a skibi un karta na e venezolanonan djamars bisando ku ta tempu pa “rekonstruí e pais”.
Figuera a señalá ku semper e tabata leal na Maduro, pero ku Venezuela a sufri un deterioro perhudisial. Ounke e no a nombra e lider opositor Juan Guaidó, el a skibi ku “a yega ora pa buska otro formanan pa hasi polítika den e pais”.
E visepresidente di Brasil a bisa ku e situashon na Venezuela a yega na un punto sin regreso. Eks general Hamilton Mourao a bisa djamars ku e lidernan di oposishon Juan Guaidó i Leopoldo Lopez lo “wòrdu arestá”, òf presidente Nicolás Maduro “lo bai”.