HEJERE, ETIOPIA, AP.- Un kantidat kresiente di aerolínea i paisnan a suspendé uso di e Boeing MAX 8, miéntras un ekipo global di investigadó a kuminsá retirá ruinanan na e sitio kaminda e avion di Ethiopian Airlines a kai.
Algun liña aéreo a ekspresá su preokupashon pa nan pasaheronan biaha ku e Boeing 737 MAX 8, na momentu ku ekspertonan ta studia detayenan di e desaster di djadumingu, kual a laga un saldo di 157 morto. E konklushon i resultadonan di e investigashon por dura vários luna. Outoridat di Aviashon sivil britániko a bisa den un komunikado ku a “emití instrukshon pa impedí buelonan komersial di pasahero di kualkier operador ku yega, sali òf bula den e espasio aéreo di Reino Uní”. Esaki ta un medida similar adoptá pa Oustralia, Singapur, Oman, Malasia i últimamente Fransia i Alemania.
E aerolíneanan Estar Jet, di Surkorea i Norwegian Air Shuttle ta esnan mas resien pa uni e medida aki.
Boeing a señalá ku no tin motibu pa kanselá e buelonan di su avion popular i ku lo no emití mas rekomendashon na su klientenan. Su ekipo tékniko a uni e investigashon enkabesá pa outoridat etiope i ekspertonan merikano, israelí i di otro paisnan.
