WASHINGTON, AP.- E gobièrnu di Merka a anunsiá e ampliashon di un programa ku ta rekerí pa e solisitantenan di asilo keda den México. Ademas, a indiká ku bou di e programa aki, 240 persona a wòrdu debolbé pa México pa nan warda riba desaroyo di su trámite einan.
E programa di Donald Trump su gobièrnu ta konstituí un kambio radikal den e forma kon Merka ta manehá kaso di inmigrantenan ku pidi asilo i kende ta hui di persekushon den nan pais di orígen. Esaki ta wòrdu apliká miéntras ku e arestonan na frontera a oumentá na su nivel mas haltu den yanüari den 12 aña. Mayoria di e arestonan ta di solisitantenan di asilo ku ta entregá na outoridat pa evitá ku nan ta wòrdu kapturá.
Sekretarianan di Relashon di Eksterior i Gobernashon di México a bisa den un komunikado konhunto ku e pais no ta di akuerdo ku e kambio di polítika unilateral di Merka. E komunikado ta bisa ku e gobièrnu mehikano a traha ku funshonarionan merikano pa kousanan humanitario i ku un gran kantidat di esnan ku a regresá tin pèrmit pa keda den México.
Normalmente, e migrantenan ta warda den Merka, miéntras nan kaso ta wòrdu atendé. Segun Trump, esaki ta un kuestion di “kaptura i liberá”.
