JARTUM, SUDAN, AFP.- Merka, Fransia, Alemania i Reino Uní entre otro a kuminsá evakuá ayera nan siudadanonan i otro personal diplomátiko di Sudan, kaminda kombatenan entre ehérsito i paramilitarnan a drenta nan di dos siman.
E violensia den e pais di Afrika aki, di algun 45 mion di habitante a surgi dia 15 di aprel entre ehérsito di general Abdel Fatah al Burhan, gobernante di Sudan for di despues di e gòlpi di estado na 2021 i su rival general Mohamed Hamdane Daglo lider di e forsanan di apoyo rápido FAR.
E konfrontashonnan ta tuma lugá spesialmente na Jartum, kapital i den e region di Darfur. E prezunan a keda librá di sigur un prisòn, asina abogadonan a bisa miéntras ku otro fuentenan a informá di e atakenan kontra dos otro prisòn prinsipalmente di Kober kaminda tin prezunan polítiko inkluyendo e diktador Omar al Bashir será.
Mas di 420 persona a muri i 3700 a keda heridá te ku awor, segun e organisashon mundial di Salú OMS. Papa Francisco a pidi e dos bandanan ku ta den pleitu pa nan bai den diálogo teniendo na kuenta e situashon grave ku e pais ta bibando. Dos tregua akordá anteriormente den siman no a logra detené e chokenan.
