WASHINGTON, MERKA, AFP.- Merka lo deportá solamente inmigrantenan indokumentá si ta konsiderá nan komo un menasa pa seguridat di e pais, segun polítikanan di maneho nobo di Joe Biden su gobièrnu anunsiá djaweps.
E medidanan, ku ta limitá riesgo di deportashon di miónes di persona ta konta pa tur esnan ku a yega Merka promé ku 1e di novèmber 2020.
Segun konteo, mas di 11 mion inmigrante ta bibando ilegalmente den Merka i “nos no tin rekurso pa detené nan i deportá nan tur”, asina e sekretario di Seguridat Interior, Alejandro Mayorkas a bisa den un memorando ku el a manda pa Servisio di Inmigrashon i Kontrol di Duana na Merka (ICE).
Mayoria di nan tin vários aña ta kontribuí ku sosiedat, tin esnan ku a yuda den e lucha kontra COVID-19, otronan ta lider di kongregashonnan religioso òf ta hasi trabounan agríkola pisá”, asina Mayorkas a bisa.
E reglanan nobo ta priorisá deportashon di estranheronan ku ta un “menasa pa seguridat nashonal”, manera aktividatnan terorista òf di spionahe, òf esnan ku ta un “menasa pa seguridat públiko” pa motibu di delitonan òf infrakshonnan grave.
Outoridatnan a detené mas di 1,3 mion persona krusando ilegalmente na frontera desde México. Di e 11 mion migrantenan indokumentá den Merka, kasi mitar ta di Mexico. Dos mion ta di sentroamerika i un mion i mei di Asia.
E republikanonan ta akusá presidente Biden pa e krísis na frontera di e pais, dor ku el a relahá e polítikanan migratorio di su antesesor Trump.
