GUAYAQUIL, ECUADOR, AFP.- Alrededor di 900 polis ekuatoriano ta luchando pa haña kontròl di un prizòn den haf di Guayaquil, kaminda un tiroteo a laga por lo ménos 116 prezu morto, inkluyendo seis dekapitá.
E tiroteo a kuminsá djamars, i a wòrdu okashoná pa gangnan rival.
Te ainda 116 persona a muri i 80 ta heridá, segun indikashon di presidente Guillermo Lasso, kende a deklará estado di eksepshon den tur prizòn ekuatoriano.
E estado di eksepshon dekretá aki ta suspendé derechi sivil di tur prezu i usa forsa públiko pa establesé normalidat.
Segun e wèpsait lokal Primicias, e peleanan a kuminsá despues ku prezunan di un gang a selebrá kumpleaño di un di nan lidernan detené, i proklamá ku nan tin poder den prizòn. Esaki no a kai na agrado di otro organisashonnan rival ku a enfrentá e otro grupo ku arma di kandela.
Dos polis tambe a wòrdu heridá den e tiroteo aki.
