SIUDAT HIDALGO, MEXICO, AP.- E gobièrnu mehikano a atvertí djaluna ku no ta tolerá trafikashon di personanan den su kampaña pa para e migrantenan ku ta krusa via su teritorio riba kaminda pa Merka i a duna detayenan nobo tokante e “reskate” ku a wòrdu hasí na final di siman, kaminda a detektá kasi 800 migrante biahando den 4 trùk.
E sekretario di Eksterior, Marcelo Ebrard, a bisa ku mas di 150 di e migrantenan aki, 785 total, tabata mucha. El a afirmá ku a trata di un reskate pasó e migrantenan tabata den kuater trùk i ku nan tabata kore peliger di stek muri.
Ebrard a papia miéntras México ta sigui desplegá 6.000 efektivo di su Vigilante Nashonal na frontera ku Guatemala.
México ta aselerando su esfuersonan pa redusí e kantidat di migrantenan sentroamerikano ku ta yega frontera di Merka. e gobièrnu di presidente Andres Manuel Lopez Obrador a primintí ku lo redusí e fluho pa evitá ku e presidente merikano Donald Trump ta imponé impuesto riba eksportashon mehikano pa Merka.
