BEIRA, MOZAMBIQUE, AP.- Nashon Uní a hasi un yamada di emergensia djaluna pa rekoudá 282 mion dòler durante e próksimo tres lunanan pa yuda Mozambique kuminsá rekuperá despues di e destrukshon kousá pa siklon Idai.
E fondonan di Nashon Uní lo wòrdu usá pa proveé awa, servisio sanitario i edukashon i pa restourá bida di e míles di personanan desplasá, segun indikashon di Mark Lowcock, hefe di Asuntunan Humanitario di Nashon Uní.
Pronto lo hasi un petishon separá pa yuda Zimbabwe i Malawi, kual a wòrdu afektá pa e siklon tambe.
Lowcock a bisa ku e fondo pa víktimanan di e siklon a kuminsá yega, inkluyendo 22 libra di parti Gran Bretaña. E direktor ehekutivo di UNICEF, Henrietta Fore, a bishitá e siudat di Beira, na Mozambique, i a bisa: “Esaki ta un karera kontra tempu” pa yuda e personanan desplasá i evitá enfermedat.
E kantidat di víktimanan mortal kousa pa e tormenta a superá 760 persona na Mozambique, Zimbabwe i Malaui, e tres nashonnan na Afrika, gòlpiá pa e siklon 10 dia pasá. Funshonarionan a purba restourá elektrisidat i awa pa purba evitá un brote di kólera.
