WASHINGTON, AP.- Presidente Donald Trump a firma un proklamashon ku ta rekonosé soberania di Israel riba Golan Heights, kibrando mas di 50 aña di Merka su polítikanan pa ku Medio Oriente.
Banda di e promé minister israelí Benjamin Netanyahu na Kas Blanku, Trump a hasi su desishon formal, despues ku el a anunsiá esaki siman pasá via un tweet.
Netanyahu a pone preshon durante vários luna largu pa adoptá e ‘rekonosimentu’. E medida di Trump lo dun’é un empuhe polítiko algun siman promé ku elekshon na Israel.
Israel a kita Golan Heights for di Siria den e guera di Medio Oriente na aña 1967, pero mayoria di e komunidat internashonal no ta rekonosé su soberania riba e teritorio. Merka ta e promé pais ku ta rekonosé e soberania israelí riba Golan, kual sobra parti di e komunidat internashonal ta konsiderá komo teritorio okupá.
Líbano a bisa ku Golan Heights ta teritorio “sirio árabe” i ku “ningun pais por kambia historia” dor di trasladá un teritorio di un pais pa un otro pais.