BEIJING, CHINA, AFP.- Periodistanan oustraliano Cheng Lei a paresé den korte na China, pa motibu ku e ta akusá ku revelashon di sekretonan di Estado. E por haña bida largu den prizòn pa e akusashon aki.
A arestá e periodista desde ougùstùs 2020 i te ku febrüari 2021 no a akus’é formalmente pa “revelá sekretonan di estado ilegalmente den estranhero”. E tabata presentadó di e kadena estatal di China, CGTN.
Outoridatnan chines no a duna sufisiente informashon di e akusashonnan i no a permití akseso na huisio di e embahador di Oustralia, kende a bisa ku e situashon “ta profundamente preokupante”.
“Nan no ta duna nos akseso na e huisio”, asina embahador Graham Fletcher a bisa na reporteronan dilanti di korte na Beijing.
Fletcher a bisa ku outoridatnan a invoká “seguridat nashonal” pa prohibí akseso na e kaso.
Beijing a deskartá tur krítika bisando ku Oustralia “mester respetá soberania hudisial di China i no mete ku órganonan hudisial chines”, asina e bosero di diplomasia di China, Wang Wenbin a bisa.
