CARACAS, AP.- E sindikato di pilotonan na Spaña a pidi e aerolínea Air Europa pa suspendé tur buelo pa Venezuela, despues ku un tripulashon a wòrdu atraká den e pais suramerikano.
Organisashon Sepla a bisa djaluna ku dos piloto i otro tripulante a wòrdu asaltá djasabra na momentu ku nan tabata yegando aeropuerto di Maiquetia pa nan hotèl den e kapital venezolano.
E tripulashon su trùk a wòrdu rondoná pa tres suheto riba motersaikel ku a hui despues di interkambiá di tiru ku un otro hòmber, kual tabata un polis bistí na sivil. Ningun miembro di e tripulashon a resultá heridá, segun indikashon di e tripulashon na e gremio.
E sindikato a bisa ku Air Europa a indiká ku e tripulashon no mester pasa anochi na Venezuela.
Eksploshon
Tabatin un eksploshon ku a tuma lugá riba un planta di koriente na Caracas, meimei di un blackout nashonal ku ya tin vários dia andando.
E kandela a subi desde e planta di koriente di Baruta djaluna mardugá, hasiendo e sensashon di káos entre e pueblo venezolano mas pió. E pais ta pasando dor di un krísis ekonómiko grave i un konfrontashon polítiko amargo.
E lider opositor Juan Guaidó a bisa ku tres di e kuater transformatòrnan eléktriko den e kapital a stòp di funshoná i e ingenieronan públiko no por drecha esakinan. Guaidó, kende ta presidente di Asamblea Nashonal, i kende ta wòrdu rekonosé pa diferente gobièrnu komo presidente interino di Venezuela, a bisa ku e blackout a kuminsá djaweps i ta debí na korupshon i mal maneho di gobièrnu.
Presidente Nicolás Maduro ta akusá Guaidó i Merka di lansa un “atake informátika” kontra e ret eléktriko den e pais. Merka ta ninga e akusashon aki.
