KAMPALA, UGANDA, AP.- Ekiponan di reskate ugandes a rekuperá kadaver di un boto ku a senk den e lago Viktoria, kaminda por lo ménos 30 persona a muri segun indikashon di polis.
E barku a senk alrededor di 7 or di anochi serka di Kampala, e kapital, segun e polis ofisial Zurah Ganyana.
Ganyana a bisa ku e boto tabata den mal kondishon i tabatin prohibishon pa nabegá durante algun tempu. El a indiká ku nan no tabatin e pèrmit bálido pa nabegá.
E boto tabatin pasaheronan ku a hasi un biahe di plaser di Lago Viktoria, un aktividat popular di fin di siman entre hóbennan di Kampala. E noufragio a pasa serka di un playa den oranan di anochi.
Un helikòpter a sirkulá e área pa haña mas kadaver miéntras un ekipo di sambuyadó tabata buska den fondo.
E motibu dikon e kantidat di morto tabata asina haltu, miéntras e insidente a pasa serka di playa tabata debí na intoksikashon, segun Asuman Mugenyi, direktor nashonal di operashonnan polisial a informá. Segun un konteo di sobrebibiente, tabatin sufisiente salbabida na bordo di e boto, ku e pasaheronan a ninga di usa.
