UNO, PERU, AFP.- Un protesta kontra gobièrnu na Puno a kombertí den un fiesta di karnaval ku manifestantenan i polisnan ta spùit awa i skuma riba otro, un gesto amistoso ku ta kontrarestá e konvulshon sosial ku Perú ta pasando aden desde desèmber.
E selebrashon partikular a sosodé kasi mèrdia, despues ku un marcha pa rekordá e 48 sivilnan ku a muri den e konfrontashonnan ku kuerponan di seguridat a yega e sede di komisaria polisial dilanti di Plaza Mayor di Puno.
Tur dia di nobo un grupo di persona ta reuní riba e plaza aki pa ekspresá nan malkontentu ku e gobièrnu di Boluarte. Nan ta duna un diskurso i despues nan ta bai.
Pero djárason kosnan a kana otro, despues di e marcha e manifestantenan a kuminsá basha skuma, awa, konfeti i talko riba e polisnan, ku tabatin nan ekiponan anti motin bistí, i ku a wòrdu kubrí ku e skuma di karnaval riba nan eskudonan i riba nan kurpa.
E polisnan a reakshoná amistosamente bashando skuma i awa riba e manifestantenan.
