LONDON, REINO UNI, AFP.- Reino Uní i Union Oropeo a proklamá un kapítulo nobo den nan relashon komersial den e provinsia britániko di Nort Irlanda.
Despues di lunanan di tenshon i negosiashonnan pisa, e promé minister britániko Rishi Sunak i e presidente di e komishon oropeo Ursula von der Leyen a anunsiá e akuerdo den un konferensia di prensa na Windsor, London.
“Ta un komienso di un kapítulo nobo den nos relashonnan”, segun Sunak. Reino Uní i UE tabatin nan diferensianan den pasado, pero nan ta aliado, sosio komersial i amigu, asina el a enfatisá.
“Loke nos akordá awe ta históriko”, asina Von der Leyen kende a papia tambe di un kapítulo nobo den e relashonnan entre Bruselas i London a bisa promé di a reuní na Windsor ku rei Charles III.
Rishi Sunak a splika ku e akuerdo nobo ta hasi mas suave e servisio di duana ku a kuminsá kuné defakto den laman di Irlanda pa protehá e merkado úniko oropeo den e provinsia britániko despues di Brexit.
