MOSCOW, RUSIA, AFP.- E presidente di Belarus, Alexander Lukashenko, a anunsiá ku Rusia ya a kuminsá transferí armanan nuklear pa su pais. Esaki ta un desishon ku segun oposishon, Belarus ta un menasa pa “Ukrania i Europa kompleto”.
Lukashenko a hasi e anunsio den un kumbre regional na Moscow. El a indiká ku e presidente ruso Vladimir Putin a komuniká ku ya el a firma e dekreto pa manda ‘warheads’ nuklear. E no a indiká eksaktamente si e proyektilnan ya a yega riba e teritorio di Belarus.
Moscow a anunsiá den mart ku lo desplegá armanan nuklear “táktiko” riba e teritorio di Belarus. Esaki a subi temor ku lo bini un empeoramentu den e konflikto na Ukrania i generá kritiká di e komunidat internashonal, spesialmente di potensianan mundial.
“Esaki no solamente ta pone bida di habitantenan di Belarus den peliger, pero tambe ta krea un menasa pa Ukrania i Europa”, asina e opositor di Belarus den eksilio, Sviatlana Tsikhanouskaya a bisa riba Twitter djaweps.
