SOLDEU, ANDORRA, AFP.- E promé minister spañó Pedro Sanchez a anunsiá djárason ku su pais lo duna por lo ménos 7,5 mion vakuna kontra COVID na paisnan latinoamerikano durante 2021.
Spaña “lo warda entre 5 i 10% di e vakunanan ku nos pais mester haña pa Latinoamérika”, segun indikashon di Sanchez den un foro polítiko ku 19 pais latinoamerikano, i tambe Spaña, Portugal i Andorra.
E porsentahe aki ta “por lo ménos 7,5 mion vakuna pa fin di e aña aki”, segun Sanchez a bisa afirmando ku akseso na “e vakuna mester ta igual i universal”. E mandatario a bisa ku lo entrega e vakunanan via Covax, un programa establesé pa Organisashon Mundial di Salú pa akseso igual na vakunanan.
E presidente a agregá ku Spaña lo kuminsá hasi e entreganan na momentu ku e pais “vakuná 50% di e pueblo”. E meta ta pa vakuná 70% di 47 mion spañó pa ougùstùs. Te ainda Spaña a vakuná 3,6 mion persona, kual ta 7,6% di su poblashon.
Segun sifranan di e ministerio spañó di salú, e pais a kumpra 93 mion vakuna, muchu mas di loke ta nesesario pa bakuná e poblashon.
